Şirvan-Salyan Regional Mədəniyyət İdarəsinin təkilatçılığı ilə keçirilən görüş Biləsuvar rayon Heydər Əliyev Mərkəzində baş tutub. Görüşdə Şirvan-Salyan Regional Mədəniyyət İdarəsinin rəisi Şahin Şahbazov, Biləsuvar Rayon İcra Hakimiyyəti başçısının müavini Ləman Yüzbaşova, mədəniyyət müəssisələrinin işçiləri, sənətçilər və ictimaiyyət iştirak edib.
 
İlk olaraq Dövlət Himni səsləndirilib, ulu öndər Heydər Əliyevin və torpaqlarımızın azadlığı uğrunda canından keçən şəhidlərin xatirəsi bir dəqiqəlik sükutla anılıb. 
 
Tədbiri giriş sözü ilə açan Şirvan-Salyan Regional Mədəniyyət İdarəsinin rəisi Şahin Şahbazov qonaqları salamlayaraq Xalq rəssamı Əşrəf Heybətovun yaradıcılığı barədə geniş məlumat verib. Digər çıxış edən natiqlər özünəməxsus, orijinal yaradıcılığı olan rəssamın xalqının mədəniyyət və incəsənətinin tanınması üçün fasiləsiz göstərdiyi xidmətlərdən bəhs ediblər.
 
Sonra Xalq rəssamı Əşrəf Heybətovun əsərlərindən ibarət sərgiyə baxış olub. Sonda Xalq rəssamının ustad dərsi təşkil edilib, gənc və yeniyetmə həvəskar rəssamların suallarını cavablandırıb.