Şirvan-Salyan Regional Mədəniyyət İdarəsinin təşkilatçılığı ilə Xalq rəssamı Əşrəf Heybətovla görüş olub. Salyan rayon Heydər Əliyev Mərkəzində keçirilən görüşdə Şirvan-Salyan Regional Mədəniyyət İdarəsinin rəisi Şahin Şahbazov, Salyan Rayon İcra Hakimiyyəti başçısının humanitar məsələlər üzrə müavini Rəşad Cəbrayılov, YAP Salyan rayon təşkilatının sədri Elmar Əhmədov, mədəniyyət müəssisələrinin rəhbərləri, rəssamlar, sənətçilər və ictimaiyyət iştirak edib.

 

İlk olaraq Dövlət Himni səsləndirilib, ulu öndər Heydər Əliyev və torpaqlarımızın azadlığı uğrunda canından keçən şəhidlərin xatirəsi bir dəqiqəlik sükutla anılıb. 

 

Çıxışlarda Xalq rəssamı Əşrəf Heybətovun çoxşaxəli həyat və yaradıcılıq yoluna nəzər salınıb. Qeyd olunub ki, Almaniyada yaşayan həmyerlimiz, UNESKO Beynəlxalq Rəssamlar Federasiyasının üzvü, Xalq rəssamı Əşrəf Heybətovun əsərlərinin əsas mövzusu doğma Azərbaycanla bağlıdır. Rəssamın indiyədək dünyanın bir çox ölkələrində fərdi sərgiləri təşkil edilib. Əşrəf Heybətov, eyni zamanda, Rusiya Rəssamlıq Akademiyasının, Azərbaycan Rəssamlar İttifaqının, Qərbi Avropa Elm və Mədəniyyət Akademiyasının üzvüdür.

 

Sonra Xalq rəssamı Əşrəf Heybətovun əsərlərindən ibarət sərgiyə baxış keçirilib və o, tamaşaçıları maraqlandıran sualları cavablandırıb. Görüşdə Salyan rayon Mədəniyyət Mərkəzinin Əməkdar artist Həsənağa Sadıqov adına "Mahirlər" Ailə Xalq Ansamblının təqdimatında musiqilər ifa olunub.

 

Elə həmin gün Xalq rəssamı Əşrəf Heybətovun Salyan Dövlət Rəsm Qalereyasında ustad dərsi təşkil edilib. Sənət adamı ilk olaraq rəsm qalereyasının ekspozisiya zalında sərgilənən tabloları izləyib. Əşrəf Heybətov ustad dərsində gənc və yeniyetmə həvəskar rəssamların suallarını cavablandırıb, müxtəlif mövzulu eskizlər işlənilib.