Neftçala rayon Xanoğlan Məmmədov adına Mədəniyyət Mərkəzinin təşkilatçılığı ilə dahi Azərbaycan şairi Məhəmməd Füzulinin 530 illik yubileyinə həsr olunan ədəbi-bədii gecə keçirilib. Neftçala şəhər Camal İsmayılov adına Uşaq İncəsənət Məktəbində keçirilən gecədə Rayon İcra Hakimiyyətinin başçısı Mirhəsən Seyidov, Şirvan-Salyan Regional Mədəniyyət İdarəsinin rəisi Şahin Şahbazov, YAP Neftçala rayon təşkilatının sədri Ülvi Fərzəliyev, şəhid ailələri, ədəbiyyatsevərlər və ictimaiyyət nümayəndələri iştirak ediblər.

Tədbirdə çıxış edənlər Məhəmməd Füzulinin Azərbaycan ədəbi-bədii fikrinin inkişafında müstəsna yer tutduğunu bildiriblər. Qeyd olunub ki, Yaxın və Orta Şərq ölkələri ədəbiyyatına mühüm təsir göstərən qüdrətli sənətkar hərtərəfli biliyə malik mütəfəkkir kimi həyata, insana dərin məhəbbət aşılayıb və daim gözəllik duyğusu yaradıb. Məhəmməd Füzuli anadilli poeziyanın mükəmməl nümunələrini yaradaraq, Azərbaycan bədii dilini daha da zənginləşdirərək yeni zirvəyə yüksəldib. 

Gecədə şairin qəzəllərindən nümunələr səsləndirilib, muğam və təsniflər, "Leyli və Məcnun" operasından hissələr təqdim edilib, məktəblilərin ifasında "Söhbətül-əsmar" əsərindən səhnəcik nümayiş etdirilib.