Biləsuvar rayon Nihad Babayev adına Xırmandalı kənd Uşaq İncəsənət Məktəbi "Yaşıl dünya naminə həmrəylik ili" çərçivəsində konsert proqramı ilə çıxış edib.
                                              Biləsuvar Gənclər Evində baş tutan tədbirdə Şirvan-Salyan Regional Mədəniyyət İdarəsinin rəisi Şahin Şahbazov, Biləsuvar Rayon İcra Hakimiyyəti başçısının müavini Ləman Yüzbaşova, mədəniyyət, təhsil işçiləri və ictimaiyyət iştirak edib.

Çıxış edənlər "Yaşıl dünya naminə həmrəylik ili"ndə keçirilən tədbirlərdən dünyanı narahat edən ekoloji problemlər, iqlim dəyişiklikləri və onların canlı aləmə mənfi təsirlərindən və ekoloji mədəniyyətdən söhbət açaraq bu sahəyə diqqətin artırılması, beynəlxalq həmrəyliyin gücləndirilməsinin məqsədəuyğun olduğunu diqqətə çatdırıblar.

Çıxışlardan sonra incəsənət məktəbinin xor kollektivi, xalq çalğı alətləri ansamblı, vokal, rəqs və nağaraçalanlar qrupunun rəngarəng çıxışları təqdim olunub. İfalar tamaşaçılar tərəfindən maraqla qarşılanıb.