Salyan rayon Mədəniyyət Mərkəzi və Kürqaraqaşlı kənd Diyarşünaslıq Evinin birgə təşkilatçılığı ilə Od çərşənbəsinə həsr olunan bayram tədbiri keçirilib.

Kürqaraqaşlı kənd Diyarşünaslıq Evində keçirilən tədbirdə rayon rəsmiləri, YAP Salyan rayon təşkilatının sədri və üzvləri, Şirvan-Salyan Regional Mədəniyyət İdarəsinin rəis müavini, ziyalılar, mədəniyyət işçiləri və ictimaiyyət iştirak edib.

Bayram tədbirində Novruz adət-ənənələrini özündə əks etdirən nümunələr və kompozisiyalar təqdim edilib, "Cəngi" Milli Nəfəsli Folklor Xalq Kollektivi, Əməkdar artist Həsənağa Sadıqov adına "Mahirlər" Ailə Xalq Ansamblı, "Gənclik" İnstrumental Xalq Ansamblı və solistlərin ifasında geniş konsert proqramı təqdim olunub. 

Tədbirin sonunda "Hünər" sirk-estrada kollektivinin pəhləvan və idmançıları maraqlı performanslar nümayiş etdiriblər.