Salyan rayon mədəniyyət müəssisələri arasında intellektual yarış təşkil edilib.

Ulu öndər Heydər Əliyevin anadan olmasının 100 illik yubileyinə həsr olunan yarışda 8 komanda iştirak edib. 5 turdan ibarət olan yarışda Salyan rayon Mərkəzləşdirilmiş Kitabxana Sisteminin "Sirlər xəzinəsi" komandası 1-ci yeri, Yenikənd kənd Musiqi Məktəbinin "Harmoniya" komandası 2-ci yeri, Salyan Dövlət Kukla Teatrının "Turan" komandası isə 3-cü yeri qazanıb.

Qaliblərin mükafatlandırma mərasimində çıxış edən Şirvan-Salyan Regional Mədəniyyət İdarəsinin rəisi Şahin Şahbazov bildirib ki, bu cür intellektual yarışlar davamlı olacaq və Regional Mədəniyyət İdarəsinin bütün müəssisələrini əhatə edəcək.

Şirvan-Salyan Regional Mədəniyyət İdarəsinin baş məsləhətçisi, Salyan rayonu üzrə nümayəndə Şamxal Əhmədov və başqa natiqlər çıxışlarında qeyd ediblər ki, intellektual yarış həm də mədəniyyət müəssisələri arasında dostluq əlaqələrini möhkəmləndirəcək.

Sonda Mədəniyyət İşçiləri Həmkarlar İttifaqı Salyan rayon komitəsinin dəstəyi ilə baş tutan mükafatlandırma mərasimində qalib komandalara diplom və qiymətli hədiyyələr təqdim edilib.