Neftçala Rayon İcra Hakimiyyətinin dəstəyi, Camal İsmayılov adına Neftçala şəhər Uşaq incəsənət məktəbinin təşkilatçılığı ilə 44 günlük Vətən Müharibəsi zamanı qəhrəmanlıq göstərərək şəhidlik zirvəsinə ucalmış və ölümündən sonra “Vətən Müharibəsi Qəhrəmanı” adına layiq görülən baş gizir İsmayılov Camal Vidadi oğlunun anadan olmasının 38-ci ildönümü münasibətilə tədbir keçirilib.
Tədbirdə iştirak edən icra hakimiyyətinin başçısı Mirhəsən Seyidov, rayonun hüquq-mühafizə orqanlarının rəhbərləri, Camal İsmayılovun ailə üzvləri və döyüş yoldaşları, şəhid valideynləri və müharibə iştirakçıları, o cümlədən tədbirə qonaq gəlmiş Sumqayıt Şəhər İcra Hakimiyyətinin məsul şəxsləri ilk öncə Neftçala rayonunun Şəhidlər Xiyabanını ziyarət edib xiyabanda dəfn olunan şəhidlərimizin, o cümlədən Camal İsmayılovun məzarı üzərinə gül dəstələri düzüblər.
Şəhidlər Xiyabanı ziyarət edildikdən sonra tədbir iştirakçıları və rayonun qonaqları Camal İsmayılov adına Uşaq incəsənət məktəbinə gələrək Vətən Müharibəsi Qəhrəmanı Camal İsmayılovun yenicə hazırlanmış büstünün açılışında iştirak ediblər.
Büstün açılışından sonra tədbir Camal İsmayılov adına Neftçala şəhər Uşaq incəsənət məktəbinin konsert zalında Azərbaycan Milli Konservatoriyasının nəzdində fəaliyyət göstərən Sumqayıt Musiqi Kolleci ilə, Camal İsmayılov adına Neftçala şəhər Uşaq incəsənət məktəbinin birgə hazırladıqları konsert proqramı ilə davam etdirilmişdir.