17 AVQUST

1933 – Ədəbiyyatşünas alim, professor Şamil Məmməd oğlu Salmanov (1933– 2006) anadan olub.

1934 – Moskvada sovet yazıçılarının I Ümumitifaq qurultayı başlayıb. Qurultayda Azərbaycan nümayəndə heyəti də iştirak edib. Cəfər Cabbarlı qurultayda çıxış edərək Azərbaycan ədəbiyyatının nailiyyətlərindən danışıb.

1942 – Dünya şöhrətli Azərbaycan müğənnisi, bəstəkar, SSRİ Xalq artisti Müslüm Məhəmməd oğlu Maqomayev (1942 – 25.10.2008) Bakıda doğulub. Azərbaycan Dövlət Konservatoriyasını bitirib. Beynəlxalq müsabiqələrin qalibi, Akademik Opera və Balet Teatrının solisti, Azərbaycan Dövlət EstradaSimfonik Orkestrinin bədii rəhbəri olub. “Nizami” filmində (rej. Eldar Quliyev) baş rola çəkilib.

1943 – Xalq artisti, müğənni İlhamə Məzahir qızı Quliyeva (1943 – 25.2.2016) anadan olub. Azərbaycan Televiziyası və Radiosu estrada orkestrinin, Dövlət Filarmoniyasının solisti olub.

1950 – Xalq artisti Ənvər Cəfər oğlu Həsənov Bakıda doğulub. Çəkildiyi filmlər: “Uşaqlığın son gecəsi”, “Yeddi oğul istərəm”, “Dərviş Parisi partladır”, “Qanlı zəmi”, “Cavad xan” və s.

1958 – Musiqişünas, sənətşünaslıq namizədi Aytəkin Tofiq qızı Həsənova (1958–2012) Bakıda doğulub. Bakı Musiqi Akademiyasının professoru, Mədəniyyət və İncəsənət Universitetinin kafedra müdiri olub.

1958 – Şair, tərcüməçi Əjdər Ol (Əjdər Feyzulla oğlu Cəbiyev) Hacıqabulda anadan olub.

1961 – Əməkdar mədəniyyət işçisi Əlihüseyn Hacıbaba oğlu Ağayev anadan olub. Azərbaycan Dövlət Akademik Opera və Balet Teatrında çalışır.

1983 – Əməkdar artist, qanun ifaçısı Çinarə Yaşar qızı Heydərova anadan olub.

1998 – Xalq yazıçısı Yusif Səmədoğlu (Yusif Səməd oğlu Vəkilov; 25.12.1935 – 1998) vəfat edib. “Ulduz”, “Azərbaycan” jurnallarının baş redaktoru, Milli Məclisin deputatı olub.

18 AVQUST

1901 – Xalq artisti İsmayıl Hüseyn oğlu Hidayətadə (1901 – 11.11.1951) anadan olub. Opera və Balet Teatrında “Koroğlu”, “Arşın mal alan” tamaşalarını səhnələşdirib. “Qız qalası”, “Almaz” filmlərində çəkilib.

1912 – Xalq şairi Mirvarid Paşa qızı Dilbazi (1912 – 13.7.2001) Qazax rayonunun Musaköy kəndində doğulub. “Məhəbbət”, “Partizan Aliyə”, “Ana ürəyi” poemaları, “Bənövşələr üşüyəndə”, “Yasəmən fəsli” və s. kitabların müəllifidir. Rus şairlərinin əsərlərini dilimizə tərcümə edib.

1920 – Əməkdar incəsənət xadimi, musiqişünas Lüdmila Vladimirovna Karagiçeva-Bretanitskaya (1920–2015) anadan olub. Bakı Musiqi Akademiyasında dərs deyib. Azərbaycan bəstəkarlarının yaradıcılığına dair tədqiqatların müəllifidir.

1945 – Əməkdar artist Rafiq Mustafa oğlu Əhmədov anadan olub. Bakı Musiqi Akademiyası Nəfəs və zərb alətləri kafedrasının müəllimidir.

1957 – Əməkdar mədəniyyət işçisi Gülnarə Əlibaba qızı Həsənova anadan olub. “Azərbaycanfilm” kinostudiyasında çalışır.

1982 – SSRİ Ali Soveti Rəyasət Heyətinin fərmanı ilə “sovet musiqi sənətinin inkişafında görkəmli xidmətlərinə görə” SSRİ Xalq artisti Niyazi Zülfüqar oğlu Tağızadə-Hacibəyova Sosialist Əməyi Qəhrəmani adi verilib.

2002 – Prezident Heydər Əliyev görkəmli dirijor və bəstəkar Niyazinin 90 illiyi haqqında sərəncam imzalayıb.

2009 – Prezident İlham Əliyevin sərəncamı ilə “Azərbaycan Respublikasının ərazisində yerləşən monumental heykəltəraşlıq abidələri, xatirə-memorial və memarlıq komplekslərinin ümumi görkəminin qorunub saxlanılması və ətrafının abadlaşdırılmasına dair Tədbirlər Planı” təsdiq edilib.

20 AVQUST 

1901 – Məşhur xanəndə, Xalq artisti Xan Şuşinski (İsfəndiyar Aslan oğlu Cavanşirov; 1901 – 18.3.1979) Şuşada doğulub. Muğamlarımızın bənzərsiz ifaçısı olmaqla yanaşı, “Şuşanın dağları”, “Məndən gen gəzmə”, “Ay gözəl” və s. mahnı və təsnifəri bəstələyib.

1912 – Görkəmli dirijor və bəstəkar, SSRİ Xalq artisti, Sosialist Əməyi Qəhrəmanı Niyazi (Niyazi Zülfüqar oğlu Hacıbəyov Tağızadə; 1912 – 2.8.1984) anadan olub. “Xosrov və Şirin” operası, “Çitra” baleti, “Zaqatala süitası”, “Rast” simfonik muğamının müəllifidir.

1926 – Filosof, şair, tərcüməçi, Əməkdar elm xadimi, akademik Aslan Məhəmməd oğlu Aslanov (1926 – 23.8.1995) Qazax rayonunda anadan olub. Dövlət İncəsənət Universitetinin rektoru olub, “Qızlar və bənövşələr”, “Nəğməli günlərim” və s. şeir kitablarının müəllifidir.

1929 – Azərbaycanda diktorluq məktəbinin banilərindən biri, Əməkdar artist Aydın Çingiz oğlu Qaradağlı (1929 – 28.1.1980) anadan olub. 1946-cı ildən Azərbaycan Radiosunda çalışıb.

1932 – Ədəbiyyatşünas, yazıçı İslam Məmməd oğlu Ağayev (1932 – 27.1.2014) Bakının Bülbülə qəsəbəsində anadan olub.

1940 – Rəssam, memar, Əməkdar incəsənət xadimi Elturan Vəli oğlu Avalov Bakıda anadan olub. Azərbaycan Memarlıq və İnşaat Universitetinin professoru, “Şuşanın memarlığı” və s. kitabların müəllifidir.

1945 – Yazıçı-publisist jurnalist Fazil Famil oğlu Abbasov (Güney) Cəbrayıl rayonunda anadan olub. “Qara qan” romanının müəllifidir.

1955 – Əməkdar mədəniyyət işçisi, fotoqraf Babək Barat oğlu Quliyev anadan olub. C.Cabbarlı adına “Azərbaycanfilm” kinostudiyasında işləyir.

1970 – Əməkdar artist, fortepiano ifaçısı, sənətşünas Elnarə Ramiz qızı Kəbirlinskaya anadan olub. Azərbaycan Dövlət Akademik Filarmoniyasının solistidir, Bakı Musiqi Akademiyasında dərs deyir.

1997 – Prezident Heydər Əliyev Azərbaycan professional vokal sənətinin banisi, SSRİ Xalq artisti Bülbülün 100 illik yubileyi haqqında sərəncam imzalayıb. Yubileylə bağlı yaradılan Təşkilat Komitəsinə Bakıda vokalçıların Bülbül adına Beynəlxalq müsabiqəsini keçirmək tapşırılıb.

21 AVQUST

1930 – Tanınmış ədəbiyyatşünas, akademik, Əməkdar elm xadimi, Dövlət mükafatı laureatı Bəkir Əhməd oğlu Nəbiyev (1930 – 15.3.2012) Ağdaş rayonunun Üçqovaq kəndində doğulub. AMEA-nın Nizami adına Ədəbiyyat Muzeyinin, Nizami adına Ədəbiyyat İnstitutunun direktoru işləyib.

1951 – Əməkdar artist Təvəkkül Əjdər oğlu Əliyev (1951 – 22.1.2017) anadan olub. 1973-cü ildən Lənkəran Dövlət Dram Teatrında fəaliyyət göstərib, filmlərdə çəkilib.

1964 – Yazıçı-publisist, şair, Əməkdar mədəniyyət işçisi Rəşad Müseyib oğlu Məcidov Ağcabədi rayonunda doğulub. 2004-cü ildən Azərbaycan Yazıçılar Birliyinin katibidir.

23 AVQUST 

1922 – Tarixçi alim, Azərbaycan SSR Elmlər Akademiyasının müxbir üzvü Əlövsət Nəcəfqulu oğlu Quliyev (1922 – 6.11.1969) anadan olub. Tarix İnstitutunun direktoru işləyib.

1943 – Görkəmli aktyor, Xalq artisti Şahmar Zülfüqar oğlu Ələkbərov (1943 – 12.8.1992) anadan olub. “Dağlarda döyüş”, “Yeddi oğul istərəm”, “Qatır Məmməd”, “Arxadan vurulan zərbə” və s. filmlərə çəkilib. “Sahilsiz gecə”, “Qəzəlxan” filmlərinin quruluşçu rejissorudur, filmlərin səsləndirilməsində iştirak edib.

1972 – Əməkdar artist, xanəndə Fehruz Əmirxan oğlu Məmmədov anadan olub.

2012 – Bişkek şəhərində Azərbaycan, Qazaxıstan, Qırğızıstan və Türkiyə hökumətləri tərəfindən Türk Mədəniyyəti və İrsi Fondunun Nizamnaməsi imzalanıb. Fond türkdilli ölkə rəhbərlərinin 2009-cu il oktyabrın 3-də Naxçıvanda və 2010-cu il sentyabrın 16-da İstanbulda keçirilmiş zirvə toplantılarının qərarları əsasında yaradılıb. Bakı şəhərində yerləşir. Fondun prezidenti Günay Əfəndiyevadır.

24 AVQUST

1896 – Sənətşünas alim Məhəmməd Ağaoğlu (1896–1949) İrəvan şəhərində anadan olub. 1920-ci ildə Türkiyəyə, oradan Amerikaya mühacirət edib. Miçiqan Universitetində dərs deyib, “İslam incəsənəti” jurnalının redaktoru olub.

1926 – Əməkdar incəsənət xadimi, bəstəkar, musiqi redaktoru Nazim Ağalar oğlu Әliverdibә­yov (1926 – 16.2.1985) Bakıda doğulub. Bakı Musiqi Akademiyasının professoru olub. “Mingəçevir” simfonik poeması, “Cırtdan” nağıl-operası və s. əsərlər, filmlərə musiqi yazıb.

1955 – Əməkdar artist Səbinə Aslan qızı Qasımova anadan olub. Bakı Xoreoqrafiya Akademiyasında çalışır.

1978 – Əməkdar artist Rövşən Vaqif oğlu Quliyev anadan olub. Azərbaycan Dövlət Akademik Filarmoniyasının solistidir.

1990 – Əməkdar mədəniyyət işçisi, aşıq Əkbər Zərbalı oğlu Cəfərov (1933–1990) vəfat edib. Tovuz rayonunun Bozalqanlı kəndində doğulub. “Leyli və Məftun” dastanının, çoxsaylı şeirlərin müəllifidir.

2007 – Prezident İlham Əliyev dünya ədəbiyyatının görkəmli nümayəndələrinin əsərlərinin Azərbaycan dilində nəşr edilməsi haqqında sərəncam imzalayıb.

25 AVQUST 

1910 – Əməkdar incəsənət xadimi, rəssam Bəhram Tofiq oğlu Əfəndiyev (1910– 1967) anadan olub. Gəncə Dövlət Dram Teatrında baş rəssam işləyib.

1915 – Əməkdar memar Tahir Abdulla oğlu Abdullayev (1915–2004) anadan olub.

1923 – Əməkdar artist, radio diktoru, gimnastika üzrə idman ustası Züleyxa Hacıbaba qızı Hacıyeva Bakıda anadan olub.

1926 – Xalq rəssamı Xalidə Ələkbər qızı Səfərova (1926 – 23.12.2005) Gəncədə anadan olub. Yaradıcılığında natürmort, mənzərə, xalq nağıllarına illüstrasiyalar geniş yer tutur: “Dağ çayı”, “Aşıq Qərib”, “Çövkən oyunu”, “Payız bağında” və s.

1931 – Yazıçı, naşir, Əməkdar mədəniyyət işçisi Əjdər Rza oğlu Xanbabayev (1931 – 30.5.1990) anadan olub. “Azərnəşr”in direktoru olub.

1935 – Xalq şairi Fikrət Qoca (Fikrət Göyüş oğlu Qocayev) Ağdaş rayonunun Kotanarx kəndində doğulub. “Təkərlər geri fırlanır”, “Yaralı çiçəklər”, “Oddan keçənlər” və s. poemaların müəllifidir. Şeirlərinə populyar mahnılar (“Gəl, ey səhər”, “Payız gəldi” və s.) bəstələnib.

1940 – Ədəbiyyatşünas, şair Ağasən Mehdi oğlu Bədəlzadə İsmayıllı rayonunun Pirəbilqasım kəndində anadan olub.

1942 – Şair, publisist Davud Məcid oğlu Nəsib Qazax rayonunda (1942 – 26.3.2003) anadan olub. Kitabları: “Ürək sözsüz danışır”, “Bizdən sonra yaşayanlar”, “Karvan gedir” və s.

1945 – Əməkdar artist, Dövlət mükafatı laureatı Vəfa Nüsrət qızı Fətullayeva (1945 – 21.5.1987) anadan olub. Akademik Dram Teatrında çalışıb. Televiziya tamaşalarında yaddaqalan obrazlar yaradıb. “Firəngiz” filmində (1975) baş rolda çəkilib.

1948 – Əməkdar artist Faiq Məsim oğlu Qasımov (1948–2017) anadan olub. Gəncə Dövlət Dram Teatrında aktyor və rejissor işləyib.

1956 – Xalq artisti, müğənni Ağadadaş Həmid oğlu Ağayev Cəlilabad rayonunun Hasıllı kəndində doğulub. Azərbaycan Televiziyasının solistidir. 

1964 – Əməkdar memar Akif Ələs oğlu Əliyev anadan olub.

1973 – Əməkdar artist, valtorna ifaçısı Andrey Yuryeviç Sabayev anadan olub. Bakı Musiqi Akademiyasının müəllimidir.

1973 – Əməkdar artist, tarzən Əliağa Baba oğlu Sədiyev anadan olub.

27 AVQUST 

1918 – Əməkdar rəssam Ənvər Hacıağa oğlu Almaszadə (1918 – 6.3.2007) Bakıda doğulub. Akademik Opera və Balet Teatrında rəssam (1937–1992) işləyib.

1921 – Yazıçı-dramaturq Seyfəddin Dağlı (Seyfəddin Əliağa oğlu Abbasov; 1921 – 18.1.1983) Xızıda doğulub. “Adı sənin, dadı mənim”, “Aydınlığa doğru” və s. pyeslərin, “Bahar оğlu”, “Məşəl” kitablarının müəllifidir. “Kirpi” jurnalının baş redaktoru olub.

1928 – Əməkdar rəssam Nadir Əlimuxtar oğlu Zeynalov (1928 – 16.3.1987) anadan olub.

1929 – Əməkdar mədəniyyət işçisi, aktyor, rejissor Məmmədkamal Allahqulu oğlu Kazımov (1929 – 13.12.2005) Bakıda anadan olub. Akademik Dram, Sumqayıt, Ağdam teatrlarında çalışıb, filmlərə çəkilib.

1937 – Ədəbiyyatşünas, folklorşünas, yazıçı, tərcüməçi, professor Qəzənfər Məhəmməd oğlu Paşayev Tovuz rayonunun Düzqırıxlı kəndində anadan olub. “İraq-türkman folkloru”, “Dilimiz varlığımızdır” və s. kitabların müəllifidir.

1942 – Ərəbşünas alim, akademik Vasim Məmmədəli oğlu Məmmədəliyev Bakıda anadan olub (1942 – 13.10.2019). “Qurani Kərim”in Azərbaycan dilinə tərcüməçilərindən biridir. “Ərəb dilçiliyi”, “Quran və elm” və s. monoqrafiyaların, dərsliklərin müəllifidir.

1951 – Əməkdar artist, kamança ifaçısı Mirnazim Müştəba oğlu Əsədullayev Bakıda anadan olub. Mədəniyyət və İncəsənət Universitetinin professorudur.

1990 – Azərbaycan SSR Mədəniyyət Nazirliyinin qərarı ilə Gəncə Dövlət Filarmoniyası yaradılıb. Filarmoniya “Göygöl” Dövlət Mahnı və Rəqs Ansamblının bazası əsasında təşkil edilib.

1998 – Görkəmli kinorejissor, Xalq artisti Tofiq Mehdiqulu oğlu Tağızadə (7.2.1919 – 1998) vəfat edib.

1998 – Prezident Heydər Əliyev Azərbaycan peşəkar teatrının yaradılmasının 125 illiyi haqqında sərəncam imzalayıb. Sərəncamda Azərbaycan teatr tarixinə ətrafı nəzər salınıb, yubileylə bağlı Təşkilat komitəsi yaradılıb.

28 AVQUST

1918 – Azərbaycan Xalq Cümhuriyyətinin hökuməti xalq maarifinin, orta məktəblərin milliləşdirilməsi, ölkənin bütün məktəblərində türk (Azərbaycan) dilinin icbari qaydada tədris olunması barədə qərar qəbul edib.

1935 – Tanınmış yazıçı Əlibala Qüdrət oğlu Hacızadə (1935 – 8.10.2009) Biləsuvar rayonunun Ağalıkənd kəndində doğulub. “İtkin gəlin”, “Əfsanəsiz illər”, “Ayrılığın sonu yoxmuş”, “Təyyarə kölgəsi” və s. əsərləri oxucu rəğbəti qazanıb.

1945 – Xalq artisti Böyükxanım Həsənbala qızı Əliyeva Xaçmazda anadan olub. 1973-cü ildən Lənkəran Dövlət Dram Teatrının aktrisasıdır.

1948 – Azərbaycan Kommunist Partiyası Mərkəzi Komitəsi ədəbiyyat və incəsənət sahəsində olan qüsurların aradan qaldırılması barədə qərar qəbul edib. Qərarda ədəbiyyatda sosialist realizmindən uzaqlaşma cəhdləri tənqid olunurdu.

1948 – Musiqişünas, sənətşünaslıq doktoru, professor Elxan Əlisətar oğlu Babayev (1948 – 2.2.2003) anadan olub.

1953 – Kinorejissor, ssenarist, Xalq artisti Vaqif Behbud oğlu Mustafayev anadan olub. “Bəyin oğurlanması” (C.Mirzəyevlə birgə), “Yaramaz”, “Hər şey yaxşılığa doğru” və s. bədii, ulu öndər Heydər Əliyevin həyat və fəaliyyətindən bəhs edən sənədli filmlərin müəllifidir.

1955 – Əməkdar memar Aleksandr Aronoviç Qarber anadan olub.

1965 – AMEA-nın müxbir üzvü, sənətşünaslıq doktoru, professor Ərtegin Əbdülvahab oğlu Salamzadə anadan olub. AMEA Memarlıq və İncəsənət İnstitutunun direktorudur.

1965 – Əməkdar müəllim Mehriban Əsgər qızı Rüstəmova anadan olub. Bakı şəhəri H.Sarabski adına 7 nömrəli Musiqi məktəbinin direktorudur.

1968 – Aşıq Xındı Məmməd (Məmməd Gülabı oğlu Qəniyev; 1896-1968) vəfat edib.

1984 – Xalq artisti, tanınmış müğənni Rübabə Xəlil qızı Muradova (22.3.1933 – 1984) vəfat edib. Opera və Balet Teatrının solisti olub. Əsas partiyaları: Leyli (“Leylı və Məcnun”), Ərəbzəngi (“Şah İsmayıl”) və s.

29 AVQUST

1890 – Şair, qəzəlxan Məhəmmədəli Şəfai (1890– 1967) Bakının Maştağa kəndində anadan olub.

1919 – “Kommunist” qəzetinin (indiki “Xalq qəzeti”) birinci nömrəsi çapdan çıxıb.

1929 – Tanınmış rəngkar Fərhad İbrahim oğlu Hacıyev (1929 – 17.12.1987) Şamaxıda doğulub. “Bakı ritmləri”, “Kəpəz” və b. tabloların müəllifidir. Azərbaycanda bərpa rəssamlığının əsasını qoyub, Muzey Sərvətləri və Xatirə Əşyalarının Elmi Bərpa Mərkəzinin rəhbəri (1981–1987) olub.

1945 – Əməkdar mədəniyyət işçisi Gülnar Ələkbər qızı Əliyeva anadan olub. “İçərişəhər” Muzey Mərkəzində çalışır.

1946 – Əməkdar rəssam Lətifə Nəsir qızı Quluzadə anadan olub. A.Şaiq adına Azərbaycan Dövlət Kukla Teatrının baş rəssamı işləyib, Akademik Milli Dram Teatrında tamaşalara bədii tərtibat verib.

1950 – Əməkdar artist Mirzə Qasım oğlu Ağabəyli Bakının Buzovna qəsəbəsində anadan olub. Milli Akademik Dram Teatrının aktyorudur, filmlərə çəkilib.

1952 – Əməkdar mədəniyyət işçisi, kino təşkilatçısı Məhəmməd Qənimət oğlu Dostuyev anadan olub.

1960 – Telejurnalist, Azərbaycanın Milli Qəhrəmanı Çingiz Fuad oğlu Mustafayev (1960 – 15.06.1992) anadan olub.

1965 – Məşhur tarzən, Xalq artisti Qurban Bəxşəli oğlu Pirimov (30.10.1880 – 1965) vəfat edib. 1920-ci ildən Opera və Balet Teatrının solisti olub.

1984 – Əməkdar artist, müğənni Şölə Cavanşir qızı Səfərəliyeva Bakıda anadan olub.

2005 – Azərbaycanda İctimai Televiziya və Radio yayıma başlayıb.

2008 – Azərbaycan aşıqlarının V qurultayı keçirilib. Qurultayda Xalq şairi Zəlimxan Yaqub Azərbaycan Aşıqlar Birliyinin yeni sədri seçilib.

30 AVQUST

1935 – Xalq artisti, bəstəkar, tarzən Ağadadaş Hacıbala oğlu Dadaşov anadan olub. Azərbaycan Milli Konservatoriyasında dərs deyib.

1946 – Xalq artisti, tanınmış radio diktoru Qarasim Əbdülhəsən oğlu Tağızadə (1946–2018) Beyləqan rayonunun Dünyamalılar kəndində anadan olub. Azərbaycan Radiosunun diktorlar şöbəsinə rəhbərlik edib.

1955 – Əməkdar artist Rita Cəmil qızı Əmirbəyova Bakıda anadan olub. Azərbaycan Dövlət Akademik Rus Dram Teatrında çalışır, filmlərdə çəkilib.

1967 – Əməkdar artist İlqar Cümşüd oğlu Cahangirov anadan olub. Bakı Kamera Teatrında, Gənc Tamaşaçılar Teatrında çalışıb, filmlərdə çəkilir.

1975 – Əməkdar artist, xanəndə Aygün Aydın qızı Hümbətova (Bəylər) Bakıda anadan olub. Azərbaycan Dövlət Akademik Filarmoniyasının solistidir.

1996 – Bakıda, Respublika Sarayında görkəmli şair Əliağa Vahidin 100 illiyinə həsr olunmuş təntənəli gecə keçirilib. Prezident Heydər Əliyev yubiley mərasimində iştirak edib.

2006 – Prezident İlham Əliyev İrəvan Dövlət Azərbaycan Dram Teatrının 125 illik yubileyi haqqında sərəncam verib. 

31 AVQUST

1927 – Şair, dramaturq, Əməkdar incəsənət xadimi İsgəndər Coşqun (İsgəndər Məmməd oğlu Hümmətov; 1927 – 10.12.1996) Göyçayda anadan olub. “Gəmidə söhbət”, “Qığılcımlar”, “Nəğmə dolu ürək” və s. kitabların müəllifidir.

1942 – Şair, nasir, tərcüməçi, maarifçi Rəşid bəy İsmayıl oğlu Əfəndiyev (1863–1942) vəfat edib. Şəkidə doğulub. “Qan ocağı, “Pul dəlisi”, “Diş ağrısı” və s. pyeslərin müəllifidir. Dərsliklər yazıb.

1955 – Əməkdar mədəniyyət işçisi Mayra Əliheydər qızı Almaszadə anadan olub. Bakı Xoreoqrafiya Akademiyasının Klassik rəqslər kafedrasının müdiridir.

1957 – Əməkdar artist Kübra Məmmədağa qızı Dadaşova (1957 – 12.2.2017) Bakıda anadan olub. Gənc Tamaşaçılar Teatrında çalışıb, filmlərdə (“Yuxu”, “Cavid ömrü” və s.) çəkilib.

1959 – Əməkdar artist Asif Əhməd oğlu Şirinov anadan olub. Füzuli Dövlət Dram Teatrının baş rejissorudur.

1960 – Əməkdar artist Elman Kamal oğlu Əliyev Naxçıvan şəhərində anadan olub.

1967 – Cənubi Azərbaycan yazıçısı, ictimai-siyasi xadim Səməd Behrəngi (24.6.1939 – 1967) vəfat edib. Azərbaycan nağıllarını fars dilinə tərcümə edərək nəşr etdirib.

2000 – Tanınmış şair, publisist Şahmar Əkbər oğlu Əkbərzadə (28.12.1941 – 2000) vəfat edib. “Mədəniyyət” qəzetinin baş redaktoru (1991–2000) olub.

2018 – Şəki şəhərində Xalq şairi, dramaturq, ədəbiyyatşünas, ictimai xadim Bəxtiyar Vahabzadənin ev-muzeyinin açılış mərasimi keçirilib.