Salyan rayon Heydər Əliyev Mərkəzi və Salyan Rayon İcra Hakimiyyətinin birgə təşkilatçılığı ilə Hacıbaba Hüseynovun 100 illiyinə həsr olunmuş ədəbi-bədii musiqili gecə keçirilmişdir. Gecədə mədəniyyət işçiləri, yerli dövlət orqanlarının nümayəndələri, Salyan sakinləri və rayonun qonaqları iştirak etmişlər.

Tədbirin aparıcısı, Azərbaycanın Əməkdar artisti Azad Şükürov Hacıbaba Hüseynovun həyat və yaradıcılığı haqqında məlumat verdi. O qeyd etdi ki, görkəmli xanəndəmizin muğam sənətinin inkişafındakı rolu, bu istiqamətdəki pedaqoji fəaliyyəti, təsnif və qəzəl yaradıcılığının özünəməxsusluğu, mənəvi mədəniyyətimizə verdiyi tövfə xalqımız tərəfindən yüksək qiymətləndirilir.

Gecənin bədii hissəsində Salyan şəhər Qulu Əsgərov adına Uşaq incəsənət məktəbinin müəllimlərindən ibarət ansamblın təqdimatında sənətkarın repertuarına aid olan muğam ifası tamaşaçılar tərəfindən böyük maraqla qarşılandı.