Neftçala rayon Mərkəzi Kitabxanasında görkəmli şərqşünas alim, professor Aida İmanquliyevanın 80 illik yubileyi münasibətilə "Zamanın yaddaşında" adlı konfrans keçirildi. Konfransda Neftçalanın mədəniyyət işçiləri iştirak etdilər.

Tədbiri giriş sözü ilə açan Neftçala rayon MKS-nin direktoru Gülnarə Qasımova konfransın əhəmiyyətini vurğuladı və qeyd etdi ki, bu mövzuda tədbirlər rayonun bütün mədəniyyət müəssisələrində davam etməli, dəyərli alimin 80 illik yubileyi ilə bağlı fəaliyyəti oxuculara bir daha geniş şəkildə təbliğ edilməlidir.

 “Aida İmanquliyeva Azərbaycanın ilk tanınmış ərəbşünas qadın alimi idi” mövzusunda Metodika və biblioqrafiya şöbəsinin müdiri  Bədirə Niftəliyeva, A.İmanquliyevanın həyat və fəaliyyəti ilə bağlı İnformasiya-resurs şöbəsinin müdiri Səidə Rzayeva, alimin həyatından bəhs edən MKS fondunda olan çap əsərlərinin biblioqrafik xülasəsi haqqında Oxu zalının müdiri Samirə Həmzəyeva, Aida xanımın seçilmiş müdrik ifadələri haqqında 3 saylı şəhər kitabxanasının əməkdaşı Ayşən Məmmədzadə çıxış etdilər.

Konfransın gedişində A.İmanquliyevanın həyat və yaradıcılığını əks etdirən videoçarx nümayiş olundu.

Mərkəzi Kitabxanada alimin əsərlərindən ibarət kitab sərgisi təşkil edilərək iştirakçıların və oxucuların diqqətinə təqdim edildi.