Salyan rayon Mədəniyyət Mərkəzi od çərşənbəsini təntənəli surətdə qeyd edib. Bayram tədbirində idarə, müəssisə və təşkilatların rəhbərləri, şəhər sakinləri, ictimaiyyət nümayəndələri iştirak ediblər. Mədəniyyət Mərkəzinin qarşısında keçirilən bayram şənliyini açıq elan edən Mərkəzin direktoru Lətif Zərbəliyev bütün yerli sakinləri və şəhərin qonaqlarını salamladı. O xalqımızın milli adət-ənənələrini özündə əks etdirən Novruz bayramı münasibəti ilə hər kəsi təbrik edərək, sülh və əmin-amanlıq arzuladı, ölkəmizdə bu bayramın çox qədim zamanlardan əsl milli bayram kimi qeyd edildiyini, bolluq və bərəkət, xeyirxahlığın təcəssümü olduğunu söylədi. Sonra çərşənbə adətlərinə uyğun tonqal qalanıb, keçəlin, kosanın məzəli oyunları, aktyorların ifasında Novruz adətlərinə aid müxtəlif səhnəciklər nümayiş etdirilib. Mərasim nəğmələri və xalq mahnıları tədbirə xüsusi təravət gətirib.

Bayram şənliyində “Cəngi” Xalq Kollektivi, “Mahirlər” Xalq Ansamblı və Mərkəzin solistlərinin ifasında  bir-birindən maraqlı musiqi nömrələri nümayiş olunub. Tədbir salyanlılara şən əhval-ruhiyyə bəxş edib.

Qeyd edək ki, bayram ərəfəsində bu cür tədbirlər rayonun müxtəlif ərazilərində, qəsəbə və kəndlərində də davam etdiriləcək.