14.05.2026
Mayın 12-də Neftçala şəhər Camal İsmayılov adına Uşaq İncəsənət Məktəbinin Ulu Öndər Heydər Əliyevin anadan olmasının 103-cü ildönümünə həsr olunan “Əzəmət və Zəriflik” adlı konsert proqramı keçirilib.
Sumqayıt şəhər Səid Rüstəmov adına 3 nömrəli Uşaq İncəsənət Məktəbində mədəni əməkdaşlıq çərçivəsində keçirilən konsertdə Abşeron-Xızı Regional Mədəniyyət İdarəsinin əməkdaşları, Sumqayıt şəhərində yerləşən uşaq musiqi və incəsənət məktəblərinin direktorları və müəllim heyəti iştirak edib.
Çıxışlarda məktəblərarası mədəni əməkdaşlığın əhəmiyyəti xüsusi vurğulanaraq, yaradıcılıq əlaqələrinin inkişafının vacibliyi qeyd olunub. Tədbirdə Ulu Öndər Heydər Əliyevin Azərbaycan dövlətçiliyinin möhkəmləndirilməsi istiqamətindəki tarixi xidmətlərindən, akademik Zərifə xanım Əliyevanın milli səhiyyə sisteminin və tibb elminin inkişafına verdiyi mühüm töhfələrdən bəhs edilib.
Əvvəlcə Neftçala şəhər Camal İsmayılov adına Uşaq İncəsənət Məktəbinin şagirdlərinin rəsm əsərlərindən ibarət sərgi nümayiş etdirilib.
Konsert proqramında milli musiqi nümunələri ilə yanaşı, qazax və türkmən xalqlarının musiqi nümunələri də səsləndirilib. Konsert zamanı rəssamlıq şöbəsinin şagirdləri tərəfindən canlı olaraq ərsəyə gətirilən rəsm əsərləri tədbir iştirakçılarının xüsusi marağına səbəb olub.